Act 23 | MHL | STEP | Aria Pol-ke wi Kaunsel nain wia mokak-ikiwemi maek, “Emawik, yo anane Mua Maneka keker opap baliwep ikem, ne sira samora-ko me onam-ikem, iiriw ne aakisa pun naap.”

Acts 23

Pol wi Yuuda Kaunsel nain opora wia wafuromak

1 Aria Pol-ke wi Kaunsel nain wia mokak-ikiwemi maek, “Emawik, yo anane Mua Maneka keker opap baliwep ikem, ne sira samora-ko me onam-ikem, iiriw ne aakisa pun naap.” 2 Naap maeya pris woos mua Ananaiyas naimik nain-ke wi Pol wameiya-pa ikemik nain wia maakek, “Opaimik miira-pa arufeka,” wia maakek. 3 Ne Pol-ke pris woos mua nain feenap amukarek, “No nefa urufowa-ke mua eliwa, urom tepak eliw marew. Ikoka Mua Maneka-ke nefa arufinon. No neeke pokap ikok yiena kae sira ookami yo opora efar miimam-ikowa nain, nena-keriw yiena kae sira puukami oram maneka wia maakeya yo efa arufamik.” 4 Naap maeya mua papako o wameiya-pa iimarep ikemik nain-ke amukaremi maakemik, “No momoraren. No Mua Maneka pris woos mua ekima me opowa amukaremi opor samora maaken.” 5 Ne os-ke maek, “Emar, yo o pris woos mua nain me amisarem. Moram Mua Maneka opora feenap ikua,

‘I woos mua opor samora-ko me wia maakimik.’”
(Eksodas 22.28)

6 Aria Pol naap wia urufak-na papako wi Farisi-ke ne papako wi Sadusi. Naap wia urufap kerewa wia maakek, “Emawik, yo Farisi-ke, ne yo auwa pun wi Farisi teeria-ke. Ne yo feenap maiyem, ‘Mua umimik nain kiiriw iikirikuan.’ Opora naap maemkun opora-pa efa wuaman.” 7 Aria naap maeya wi Farisi ne wi Sadusi opora aakunemi wiam fienami wiam fookamik. 8 Moram wi Sadusi-ke maimik, mua umimik nain me iikirikuan, ne wi ensel marew. Ne mua kukusa pun marew naimik. Ne wi Farisi-ke maa arow nain ikua naimik. 9 Aria wi naap maemi opora wiam fienami wiam kirirowamik, ne wi Farisi teeria amis mua papako-ke iikirap kekanemi maemik, “I mua fain pina-ko me wiar imenamik, opora aakuniya nain mua kukusa-ke e ensel-ke kema iweya naap aakuniya-yon!” 10 Aria opora wiam ipiskami iraku naep onami Pol muf-irapariwkin ami woos mua-ke ona teeria wia sesekeya orop kekanep opap aawemik. Aawep wiena pika kemena pikiwemik.

11 Ne naap ikok uura Yeesus-ke Pol wiar imenarep maakek, “No me keker opa. No iiriw yo opor eliwa Yerusalem-pa wia maakem-ikon nain ikoka kakeniw Rom ikiwep opora nain wia maakinan akena.”

Wi Pol ifakimowa naep opora anumap kaikamik

12 Aria epa wiimeya, uuriw wi Yuuda mua ten erepam naap, wiam fiirimep Pol ifakimowa opora koonowap maa enowa, eka iiwawun fariaremik. O ifakimep iiwawun maa enemi eka enimiyen, naap maemik. 14 Ne wi naap maep pris woos mua ne wi owow woos mua wiar ikiwep wia maakemik, “I aakisa opora koonowamik. I maa enowa, eka iiwawun fariarep ikok Pol ifakimep-na maa enimiyen. 15 Naapeya nis-ke i Kaunsel ne owow woos mua onaiya ami woos mua opora wia sesekomaka, feenap peeskimeka, ‘Nis-ke Pol poriwkin opor kemena baliwep maeya wiar miimiyen,’ naap maakeka. Ne i era-pa luus inep ikok poriwkin ifakimiyen,” naap maemik.

16 Ne mua oko-ke Pol weremena kokot maakemik. Ne os-ke ami mua pika wiar urupep Pol maakek. 17 Ne Pol opora naap miimap ami woos mua oko farep maakek, “Takira fain aawep ni woos mua maneka wiar pikiwe, o opora wiar ikua.” 18 Ne aria woos mua nain-ke takira nain aawep ona woos mua maneka wiar pikiwok. Pikiwep maakek, “Takira fain Pol-ke sesekeya no nefar purupem, o opora-ko nefa maakinen naiya.” 19 Naeya ami woos mua maneka-ke takira nain wapena-pa opap lawisiw naap ekap maakek, “No opora-ko ikainok-na efa maake.” 20 Ne takira nain-ke maakek, “Wi Yuuda opora feenap anumamik, wi ikoka wadolalemi no opora feenap sesekomikuan, ‘Pol poreya i opor onoma baliwep wiar amisariyen naep.’ 21 Opora naap sesekomiwkin-na me wiar miime. Wi mua ten erepam naap Pol luus inep ikaikuan, oreya ifakimiyen naemik. Wi iiriw Mua Maneka unuma-pa opora koonowap-puamik, ‘I Pol ifakimep-na maa enimiyen’ naemik. Ne aakisa no opora nefar arewap ikemik.” 22 Naap maakeya iimarow mua-ke maakek, “No opora fain mua oko-ko me wia maake.” Naap maakep sesekeya ikiwok.

Pol anim onom maneka Feliks wiar sesekamik

23 Aria ami woos mua nain-ke iimarow mua erup o tepak-pa wiar ikemik nain wia farep wia maakek, “Ni ikiwep ami teeria feenap wia aaweka, mua mereniw soomarimik nain andet erup (200) ne oos-pa karuow mua ten ikur okaiwi-pa erup (70), ne wiow mua andet erup (200). Naap wia aawep uura ama ikur okaiwi-pa erepam naap Pol wiim-ikiwep Sisaria owowa-pa wueka. 24 Ne Pol pun oos aawomaka, ne oos-pa pokap ikiwinok. Ne ni baliwep akena pikiwemi yiena woos mua maneka Feliks wapena-pa wiar wueka.” 25 Naap wia maakemi parosifa pun siisimomak. Parosifa nain feenap siisimok,

26 “Yo Klodius Lisias-ke parosifa fain no yiena woos mua maneka Feliks siisimomiyem. 27 Mua fain wi Yuuda-ke opap ifakimu naep oniwkin yos-ke yena ami mua teeria onaiya orop wapena wiar wasirkap aawep purupemik. Moram yo amisarem nain o yiena Rom anim onoma tepak-pa yiar ikua. 28 Ne iir oko yo wi opora-pa wuamik nain wiar amisarekam naep wi Kaunsel Maneka wiam fiirimep ikaiwkin poromik. 29 Yo wiar furewam nain, o pina marew, nain o ifakimiyen naimik, koora ekinok naimik. Oram maneka pina iwemik. Nain wi wiena weke opor sira muuta nain irakep opora-pa wuamik. 30 Ne wi luus inep ifakimu naep naiwkin naap wia miimap ewuriw akena no nefar sesekam. Ne wi mua o opora-pa wuamik nain naap wia maakem, ikoka no mokok epa-pa aakuneka, naap wia maakem. Yo opora muut naap.”

31 Parosifa nain siisimep wiemi wia sesekak. Ne uura wi Pol aawep ikiwemi Antipatris owowa-pa fuunemik. 32 Ne epa wiimeya wi ami teeria mereniw soomaremik nain kiiriw kirep wiena pika ekapemik, ne wi ami mua oos-pa ikiwemik nain Pol wiim-ikiwemi Sisaria owowa-pa fuunemik. Fuunep parosifa nain anim onom maneka Feliks iwemi Pol o wapena-pa wiar wuamik. 34 Ne o parosifa nain urufap-puap Pol nokarek, “No kaakew mua-ke?” Ne Pol-ke maek, “Yo Silisia kame mua-ke.” 35 Naeya maakek, “Wi mua opora-pa nefa wuamik nain feeke kereriwkin-na yo opora nefar miiminen.” Naap maep ami teeria wia sesekami maek, “Ni mua fain aawep Erot pika maneka-pa wiar wuap baliwep urufam-ikeka.”